Jamie's Italian-英國[Naked Chef]Jamie Oliver既親民意大利風情~

英國名廚Jamies 個名係電視節目聽得多，但佢開既意大利餐廳就真係未去過。留意到傳媒報導知道係香港插旗，就算排隊都想要去試吓~星期五夜晚去到個度就見到排哂長龍，個餐廳係登龍街，林寶堅尼展館隔離~

炎熱同驟雨既情況下排隊實在難受~外面排完上到2樓都係要等一陣,去到2樓，店員已經報以親切既笑容～雖然係等得耐，但見到佢地誠懇既態度唔多唔少緩和左焦急既戾氣～望一望後面，見到一壁巨龍圖案塗鴉，十分有氣勢！

夜晚去成個環境唔會好光猛～但氣氛感覺比日頭更加好～因為上2樓前，有menu比 顅客睇，所以都決定左食咩～

可能開業初期，等左相當耐既時間先有野食黎到，先黎Crispy Squid 開下胃先～

Crispy Squid:呢款係比較之後嗌左幾款食物入面我覺得最出色既一款！呢款係脆口魷魚～配蛋黃醬同檸檬。切粒形式奉 上，將檸檬汁唧落魷魚粒再沾一沾大蒜蛋黃醬，十分惹味！！外酥內嫩，無多餘炸粉，肉質柔軟魷魚都炸到恰到好處~由於外皮搽牛油炸，再加蒜味與辣椒粉仲有香 草去提升香味，真係可以食到唔停!!

Prawn Linguine:Menu 仲加上Our Famous，呢款係出名既意粉所以先叫~但意外地唔出色... 每日homemade 既意粉微暖偏凍，都有嚼口，但味道唔會好有驚喜；蝦肉較細粒，亦煮得較結實，無新鮮蝦肉既味道；番茄汁都叫鮮甜但水太多，幸好上面既rocket leaves 夾埋蝦肉同意粉都好清爽同對味~

World's Best Olives on Ice
with black olive tapenade and music bread:
造 型吸引，比一般食都來得大粒~不過橄欖新鮮就新鮮，亦好冰凍，但個人就認為鹹澀味頗重，不是個個人能接受~中間的是Music Bread 脆片配黑橄欖跟酸豆同番茄乾做成既橄欖醬。醬要配脆片食先好食同配合~就咁食略為鹹味重，Music Bread 脆片咬落亦冇預期個種很脆口既音調出來...

Crab  & Avocado Bruschetta: Bruschetta係意大利可以話常見既一種前菜或點 心~其實係一種烘烤過既麵包，包上放上唔同既材料一齊食~板上附近有綠色既牛油果蓉同蟹肉醬。麵包上鋪上一層薄薄蟹肉，再配上酸甜既青蘋果絲同少量意大利 奶酪、檸檬~不過唔配上牛油果蓉或蟹肉醬一齊食都唔係好夠惹味~ 麵包經過烘焗，都算鬆脆!份量偏少，要小心夾埋一齊食會容易鬆散。

Cured Meats Plank:賣相完全吸晴，不少顧客都有叫呢款~每當呢款菜式黎到既時候都要"餵相機"先~豐富既食材組合 放係長木板上一目了然~有辣肉腸、火腿、齊茴香莎樂美腸、同意大利肉腸。豬肉夠薄身、柔軟而帶天然肉味，配上醃製青辣椒好開胃~伴以Mozzarella 水牛芝士、雜菜絲薄荷沙律、醃橄欖同硬羊奶芝士伴薄身Music Bread，甜酸鹹辣既味道集中係口腔，個種變化豐富無比!! 而硬羊奶芝士上那小小既辣椒果醬都係亮點，甜甜辣辣，令其更突出芝士味道!!

Tiramisu:賣相未至於吸引，但未食已聞到橙味~食落去質地十分柔軟同較濕潤~咖啡蛋糕夾Mascarpone芝士灑上橙皮，層層相間又幾軟滑~味道濃郁但唔算太膩，都值得一試既~

環境:英國工業風既設計~地下有counter賣Jamie既各類產品。開放式廚房可以睇到廚師工作；座位空間尚算開揚，有舒服沙發位，但二人枱面積略嫌太細；係晚上尚算有舒適悠閒既氣氛~有香港特色既壁畫更見地道文化既味道~

服務:排隊當晚有雨，店員都友善提供雨傘、水同埋派Ham食，值得一贊~用餐時詢問有關菜式既食材或食法都有問必答；落Order唔用紙筆記低但可重複覆返亦無誤，但可能開業初期出餐時間頗長~可以自由選擇加一與否同加一既百分比~

總結:整體質素尚算不俗，賣相亦吸引，亦不設加一，但部分有名菜式失準..是較失望，但考慮價錢、環境、服務，實為不錯既選擇。

 

Jamie's Italian

銅鑼灣登龍街1號金朝陽中心2期 Midtown 2 樓

**********************************************************

更多個人分享，請到

 Facebook (facebook.com/kachun.chan.7393)       

Instagram Follow (life_is_fun_great)    

Email 聯絡 Contact (ron808808@hotmail.com)

Line分享 (kcc_lovelinego)